يوم عادى زي بقية أيام ربنا يعنى ...
قررت فيه تخرج من قوقعة الحياة اللى عايشه فيها دى...
المكان : الكورنيش .. صديقها الوحيد و المفضل برده ... بتحب أووى المكان دة..
بتحس ان هوا البحر بيقدر يغسل كل الألم اللى ماليها ... صوت الموج و هوا بيخبط ف الصخر أحلى من صوت احسن سيمفونية لبتهوفن ... مزيكا بتضيعها عليها دوشة الناس من حواليها ...
البحر بيفكرها بكل حاجة حلوة كانت فى حياتها - و كل حاجة وحشة برده. -
بيفكرها بابوها اللى كان دائما يجيبها هنا و هى صغيرة
و يعلمها ازاى تصطاد و ازاى تصبر ع الصنارة لحد ما تشبك معاها ...
بس للأسف مات أبوها من قبل ما يقولها ازاى تبقى تشدها لما تغمز...
و ملحقش يقولها و لحد دلوقتى الصنارة غرقانة ف البحر ...
افتكرت صحابها أيام دروس الثانوية العامة
لما كانوا يخلصوا الدرس مع المدرس
اللى كان كل ما يشوفهم يقولهم فين الفلوس ؟؟ ...
و لما كانوا يطلعوا مخنوقين من كل حاجة من عنده
فيجروا ع البحر يحكولوا و يشتروا بجنية لب
و يقعدوا يقزقزوا و يرموا على بعض
و يضحكوا و ينسوا العالم حواليهم بما فيه ...
افتكرت أول ولد حبيته أيام ثانوى
و لما كانت كل يوم بتعيي ماماة صحبتها
عشان تلاقي اى حاجة تقولها ف البيت عشان تنزل تقابله ع البحر
و يديها الوردة بتاعة كل يوم ..
افتكرت يوم ما مسك أيديها جامد أووى
و بصلها فى عينيها و قالها انه عمره ما هيسيبها ابدا ..
مع أنها بعد شهر بالظبط كانت واقفه فى نفس المكان دة من غيره ..
افتكرت كل مرة كانت بتبقى فرحانة كانت بتجرى فيها ع البحر ..
و تضحك مع موجته ..
و نفس الموجة دى هى اللى كانت بتغسل دموعها من الألم ...
- و افتكرت حاجات تانية برده بس مرضيتش تقولى عليها -
... و اكتشفت ان البحر لسه زي ما هو ...
بس الحياة أتغيرت كتير عن لما كانت بتشوفها معاه زمان....
لسه الموج صافى و جاي بيضحك من بعيد
مع ان لا الناس و الحياة معاها كانوا كدة
لسة فيروز بتغنى نفس أغانيها بتاعت زمان بس محدش بقى بيفهم هى بتقول ايه ...
كل حاجة زي ما هى بالظبط ... بس متغيرة و مش زي زمان ...
و ما بقتش عارفة ...
الناس هى اللى كدابة ...
و لا البحر هو اللى كان بيضحك عليها مش بيضحك ليها ...
و لا هى اللى عمرها ما كانت صادقة من جواها مع نفسها ...
لمت كل شرايط ذكرياتها و خاصمت البحر
و مشيت و سابته لوحده زى ما كانت فاكرة - بس البحر عمره ما بيكون لوحده-
بس قبل ما تمشى أمنته أمانة ... انه ما يبقاش يعمل اللى عمله معاها دة مع حد تانى بقى ،،،،
و أمانة عليك يا يا بحر ما تبقاش تيجى ع التعبانين أكتر من كدة .... !
:)
ردحذفسَبقْ الكُومنتَنَه .. :DDD
والله البحر ما له ذنب
ردحذفاحنا اللى كل يوم بيعدى علينا
بنتغير فيه عن اليوم اللى قبله
فينا بيتغير للأحسن فينا بيتغير للأسوأ
واهى ماشيه
تحياتى
هبة :
ردحذفالناس هي من تتغير وتتلون ..
تحياتي لكِ
وكبري الخط المرة الجاية
حَـبآيـۃْ.بـטּـدۉڷ
ردحذف:DDDD
iـــــــــــsــــــــــlــــــــــــaـــــــــm
ردحذفاحنا كل يوم بنتقلب بالظبط عدد موجات البحر ..
و بشوف اننا لو متفيرناش نبقى مش عايشين ..
شكرا ع المرور .. :):)
IMSA
ردحذفشكرا ع المرور .. و بعتذرعن الخط الصغير .. :):)