رسالة إالى كل مواطن عربى .. و بالأخص إلى كل مواطن مصرى .. طبعاً بعد بكرة هو اليوم المنتظر ... اليوم اللى بنتمنى يكون يوم النصر لمصر ... اليوم اللى محتاجين قبله 80 مليون كلمة يارب ...
بتهيألى ان العنوان ممكن يبقى منطقى .. لو كنا العصور الماضية و اليوم اللى احمس هيطرد فيه الهكسوس.. أو يوم القضاء عالصليبين أو التتار ..أو لو كان اليوم دة يوم جلاء الانجليز عن مصر ..أو يوم الانتصار على اسرائيل ،،وتحرير سيناء ..
أو حتى لو فى عصورنا الحالية لو كان اليوم يوم اللى مصر هتطلق فيه مصر أول صاروخ فضائى أو اليوم اللى قدر الشعب فيه انه يقاوم الفساد و الظلمه اللى حاكمين بلده و يكون له ارادة ...أو اليوم اللى قدرنا نصنع فيه سلاح نووى أو اى سلاح كيميائى نقدر ندافع بيه عن نفسنا ...أو اليوم اللى نقدر نحط فيه مناهج تعليم ناجحة ..أو..أو.. (وتقدر تبص حوليك و تكمل مكان النقط )...
ولكن لأننا شعب نسى القراءة منذ زمن بعيد ... و جهل دينه و تعاليمه (وتمسك فقط بالقشور ) منذ زمن أبعد... و لم يتعلم يوماً بمناهج تعليم محترمة ... و لم يشاهد يوما اعلاماً هادفاً ... اصبح اليوم المنتظر لدينا هو يوم مباراة مصر و الجزائر و التصعيد لكأس العالم يا ليتها كانت احدى مباريات التصفيات لكانت الصدمة اخف
طبعا شعبنا خلص كل اللى عليه .... اتعلم صح و اتثقف و اشتغل و اتعالج ,و صنع واخترع.. ومبقاش بقيله الا الكورة ... والدليل على كدة ان بقى كل احاديثه عنها.. فمبقاش ينفع تمشى ف شارع الا وتسمع الناس بيتكلموا عن المباراة و اللى هيحصل فيها .. ومبقاش ينفع تفتح اى قناة تليفزيونية الا لما يجيبوا سيرة المباراة . .. و يوم ما تزهق و تقوول تخش تشوف ايه الاحوال ع الفيس بووك .. تقريباً تلاقى معظم الصفحة حاجات عن الماتش و ناس منفعلين .. وناس هيدفعوا عمرهم عشان مصر تكسب ...
طبعاً انا مش بتمنى لمصر الخسارة ... انما الخسارة الحقيقية فعلاً .. اننا نبقى وصلنا للدرجة دى من التضليل .. ....بقينا زى العرايس بيوجهوها زى ما هما عاوزين زعلانين أووى ان تيشرت المنتخب المصرى اتحرق ...وخلاص هنعمل ثورة ..
طب لية مزعلاناش اوووى كدة و ثورنا اووى لما اتحكم ع الطبيب المصرى بالجلد.. ولما مااات الاف الناس ف حادثة العبارة الشهيرة .. ولما اتقتلت مروة الشربينى ..ولما بيتهان كل اليوم المصريين ف الخارج ..لم يحزن منا الا الفئة العاقلة الباقية .. و اللى للأسف بقت قليلة .. تقدر تقولى هو مين اللى اهم تيشرت المنتخب المصرى و لا الانسان المصرى؟؟
تقدر تقولى لو مصر كسبت دة هيأكل كاام جعاان ..هيعالج كام مريض معوش تمن العلاج ..هيعلم كاام طالب .. هيخلينا نستغنى عن كاام منتج من اللى بنستوردهم من برة ..هينضف كاام شارع ..هيخترعلنا كاام سلاح ندافع بيه عن نفسنا ؟؟
تقدر تقولى ليه اعلامنا مهتم اووى كدة بالمبارة دى .. ومش بيدى نص الاهتمام دة لعلماء يستحقوه..و لشباب محناج فعلا حد يعبر عنه .. و لشعب محتاج حد يشاركه آلامه وياترى الحكومة عاوزة تشغلنا عن ايه و اييه و اييه ؟؟..
أنا مش ضد اننا نرووح نشجع بلدنا .. ونفرح لما تكسب ..انا بس بتمنى انى اشوف ولو نص الاهتمااام لثقافته نفسى اشوف نص الحماس عشان شئ مفيد شئ يعلينا و يرفع راسنا لفوق ...
فيا مصريوون و يا جزائريون و يا عرب ... ثوروا .. اغضبوا ولكن ليس من اجل مباريات الكورة ؟؟ من أجل أطفال فلسطين اللى بيموتوا كل يووم .. من أجل ديينا اللى بيتهان .. واحنا كل اللى بنقدر نعمله اننا نضايق ..نتعاطف ..نتأثر و لكن و نحن فى أماكننا بدون حركة .. حولوا كل هذا الحماس تجاه أوطانكم .. وساعتها مش هتكون مباريات الكرة هى مصدر فرحتنا و ابتسامتنا .. وفى النهاية مقدرش اقول غير اننا لما ننهزم فى مباراة رياضية ..فدة مش عار دة أمر عادى انما العاار فعلاً لماا نكوون مهزومين ف حاجات تانية كتيير اووى .. ...
***********************************************************************************
فعلا للاسف كلامك صح جدا.بيتلعب بينا واحنا مغيبين تماما فاللهم ابرم لنا امر رشد واعدنا الي صوابنا
ردحذفاشكــــرك ع المرور .. واتمنى من كل عربى ان يساعد فى نشر التوعية من أجل الأجيال القادمة
ردحذف