أحلى ما فى المصرى إنه يمتلك شوية صفات كدة .. لا يمكن تلاقيها عند أى شعب فى العالم إلا المصريين .... و الصفات دى بتميز المجتمع المصرى عن اى مجتمع تانى ... يعنى فى شوية شخصيات شعبية كدة ..مش هتلاقيها إلا فى المصريين .. زى الشخصية المتفاخرة بنفسها على طوول .. و شخصية ال معروفة أبو العربى اللى معروفة بالكدب الزايد أووى ..و اللى هى أصلاً بورسعيدية .. انما الشخصية اللى هنتكلم عنها دلوقتى ..هى شخصية موجودة فى معظم المصريين أياً كانوا منين... و هى شخصية (( أبو العريف ))..
و أبو العريف دة شخصية منتشرة بيننا كلنا ... يعنى هتقابله و انت ماشى ف الشارع .. وانت قاعد ع القهوة .. هتتفررج عليه ف التليفزيون ..و فى كل حتة مصرية ...
نقول مثال بسيط :: ----->; :: يعنى مثلاً لو كنت قاعد فى مكان .. و فجأة حسيت بتعب ... فأطمن خالص لأنك هتلاقى أبو العربف على طوول شخصلك المرض .. و وصفلك العلاج و بعت حد يجيبهولك من الصيدلية كمان .. وكل دة قبل حتى ما تقول.... (( آآه ))..... و ربنا يرحمنا و يرحمك بقى بعد كدة ..
و يا سلام بقى لو قاعد تتفرج على ماتش ف قهوة مثلاً ..هتلاقى فجأة نفسك قاعد وسط اتحاد من المحللين و المدربين الرياضيين ... و تسمع وجهات نظر عن تشكيل اللعيبة .. وطريقة لعبهم .. دة غير الشتايم اللى بتوجه لكل من اللعيبة و المدرب ..اللى طبعاً مبيفهمش حاجة فى أى حاجة و هيودينا فى داهية ...(( و بتزيد أووى لو خسرنا كماان ..))..
بإختصار كدة احنا شعب يخااف يقول ما أعرفش ... يعنى المصرى هو الوحيد القادر على إنه يكون دكتور و مدرس و قاضى و مدرب كورة و شيخ و بيفهم ف الدين ..إلخ ... فى نفس الوقت ..
و دة طبعاً مش لأننا شعب مثقف و بيقرا كتيير ( ولو انى كنت اتمنى اننا نبقى كدة و نتكلم فى أى حاجة ) و لكن دة ببساطة لأننا شعب بيحب الفهلوة .... و نقدر نفتى فى أى حاجة ...
و الغريبة بقى أكتر إن أبو العريف دة مش بس ممكن يكون مواطن أو موظف عادى .. إنما دة فى شيوخ ليل و نهار ..نازلين علينا فتاوى ..و معرفش دكاترة و لا عطارين ..قدروا يعالجوا أمراض مستعصية و خطيرة بما يسمى الطب البديل ..و اللى
أصلا معرفش هو بديل عن ايه ؟؟!!و إلخ .. إلخ ...
و دة طبعاً مش تعميم لكل شخصيات المجتمع المصرى ...عشان ما نبقاش بنسوء سمعة البلد و لا حاجة .. انما للأسف الشخصيات دى كتروا أووى ... و طبعاً أدى لانتشار معلومات غلط كتير ف المجتمع المصرى ..و اشاعات أكتر .. و كلام لا بيقدم لكن بيأخر ...
و الخلاصة خدها نصيحة منى .. ما تصدقش كل كلمة تتقال لك .. و ما تترددش كلام إلا لما تتأكد منه و من مصادره ..
وجرب مرة تقول : ما اعرفش ... مش هتخسر حاجة .....
و إلى اللقاء إلى ما بعد فترة الامتحانات ....
ادعيلى .. شكراً
********************
********************
السلام عليكم
ردحذفمعاكي حق والله في كلامك
كله بيفتي في كله وللأسف محدش بيقول معرفش
إلا من رحم ربي
hahahahaha nice post.
ردحذفwel fatayeen byshaga3o
we e7na ma3aho
............
اشكركم ع المرور والتعليق
ردحذفانا بقه جربت اقول معرفش مع العلم ان انا مش عايش فمصر النتيجه ايه ؟؟ النتيجه ان اي حد بقوله معرفش بحس ان انا غبي بالنسباله ومش فى مستوى زكائه يظهر ان الواحد لازم يفتي فى اي مكان عشان الناس تحترم زكائه
ردحذفانا بقه جربت اقول معرفش مع العلم ان انا مش عايش فمصر النتيجه ايه ؟؟ النتيجه ان اي حد بقوله معرفش بحس ان انا غبي بالنسباله ومش فى مستوى زكائه يظهر ان الواحد لازم يفتي فى اي مكان عشان الناس تحترم زكائه
ردحذف